చీపురుపల్లి సమీపంలోని కోడూరు కొండ వద్ద గ్రావెల్ అక్రమ తవ్వకాలు విచ్చలవిడిగా సాగుతున్నాయి. పగటిపూట ఎలాంటి కార్యకలాపాలు లేకుండా ప్రశాంతంగా ఉండే వ్యక్తులు, రాత్రి సమయం కాగానే ఎక్సకవేటర్లను రంగంలోకి దించి భారీ ఎత్తున గ్రావెల్ ను తరలిస్తున్నారు. అధికారుల కంట పడకుండా రాత్రి వేళల్లోనే ఈ దందాను కొనసాగిస్తూ సొమ్ము చేసుకుంటున్నట్లు తెలుస్తోంది.
రామాంజనేయ కాలనీలోని జెడ్పీ ఉన్నత పాఠశాల మైదానానికి ఆనుకుని ఉన్న ఈ కొండ ప్రాంతంలో తవ్వకాలు జరుగుతుండటం పట్ల ఉపాధ్యాయులు తీవ్ర ఆందోళన వ్యక్తం చేస్తున్నారు. హైస్కూల్ ఆటస్థలం పక్కనే భారీ గోతులు ఏర్పడుతుండటంతో పాఠశాలకు వచ్చే విద్యార్థులకు పెను ప్రమాదం పొంచి ఉందని వారు ఆందోళన చెందుతున్నారు. సమీకృత వసతి గృహానికి సమీపంలోనే ఈ అక్రమ కార్యకలాపాలు గత కొంతకాలంగా కొనసాగుతున్నాయి.
రాత్రి సమయాల్లో ఈ తవ్వకాలు జరుగుతుండటంతో అధికారులు సకాలంలో స్పందించలేకపోతున్నారనే విమర్శలున్నాయి. ఇటీవల కొంతకాలం పాటు నిలిచిపోయిన ఈ గ్రావెల్ దొంగల తంతు తాజాగా మళ్లీ జోరందుకుంది. ఈ నేపథ్యంలో అక్రమ తవ్వకాల వల్ల పిల్లలకు ఎదురవుతున్న ముప్పును వివరిస్తూ రామాంజనేయ కాలనీ జెడ్పీ ఉన్నత పాఠశాల ఉపాధ్యాయులు ఆర్డీవోకు ఫిర్యాదు చేశారు. తక్షణమే స్పందించి ఈ తవ్వకాలను అడ్డుకోవాలని వారు కోరుతున్నారు.