అమరావతి: ఆంధ్రప్రదేశ్ స్థానిక సంస్థల ఎన్నికలపై రాష్ట్ర ఎన్నికల కమిషనర్ (ఎస్‌ఈసీ) అనిల్ చంద్ర పునేఠా కీలక ప్రకటన చేశారు. రాష్ట్ర ప్రభుత్వం గెజిట్ నోటిఫికేషన్ జారీ చేసిన తర్వాతే తాము ఎన్నికల నోటిఫికేషన్‌ను విడుదల చేస్తామని ఆయన స్పష్టం చేశారు. శుక్రవారం మీడియాతో అనధికారికంగా మాట్లాడిన ఆయన, ఎన్నికల ప్రక్రియకు సంబంధించిన పలు అంశాలను పంచుకున్నారు.
స్థానిక సంస్థల ఎన్నికలకు సంబంధించి రిజర్వేషన్లను ఖరారు చేస్తూ రాష్ట్ర ప్రభుత్వం ముందుగా నోటిఫికేషన్ ఇవ్వాల్సి ఉంటుందని అనిల్ చంద్ర పునేఠా తెలిపారు. ఓటర్ల జాబితా విషయానికి వస్తే, ఎస్‌ఐఆర్ (SIR) ప్రక్రియ తర్వాత చేపట్టిన జాబితానే పరిగణనలోకి తీసుకుంటామని చెప్పారు. ఒకవేళ ఎస్‌ఐఆర్ ప్రక్రియ కంటే ముందే ఎన్నికలు వస్తే మాత్రం ప్రస్తుత ఓటర్ల జాబితాతోనే ఎన్నికలు నిర్వహిస్తామని పేర్కొన్నారు.
ప్రభుత్వం నుంచి రిజర్వేషన్లు ఖరారైన వెంటనే రాజకీయ పార్టీలతో ప్రత్యేకంగా సమావేశం నిర్వహిస్తామని తెలిపారు. ఆ తర్వాతే స్థానిక సంస్థల ఎన్నికల నోటిఫికేషన్ ప్రకటిస్తామని చెప్పారు. రాష్ట్ర ప్రభుత్వం నుంచి వచ్చే తదుపరి సూచనలు మరియు మార్గదర్శకాల ఆధారంగా ఎన్నికల నిర్వహణకు తాము సర్వసిద్ధంగా ఉన్నామని ఎస్‌ఈసీ అనిల్ చంద్ర పునేఠా తేల్చిచెప్పారు.